عشان نحب

دكتورة ثناء الشريف

11:58 م

الإثنين 16/أبريل/2018

 
محتاجين نتطمن إن اللي داخل حياتنا داخل عشان يرضينا ويبقى نقطة القوة اللي فينا،محتاجين نتطمن إننا عمرنا ما هنتساب ولا نتهان ولا نتجرح،ولا إنكم هتتغيروا في عنينا وتفضلوا زي أول مرة عرفانكم،عايزين نتطمن على نفسنا واحنا معاكم ونحس إنكم محاوطين علينا برموش عنيكم،نحس وياكم إننا أطفال بنتصرف بمنتهى البراءة بدون خوف لو غلطنا،محتاجين وقت نتسمع فيه ونتناقش قبل القرارات،محتاجين نتصالح كل يوم قبل النوم مهما كانت المشكلة،عشان نحب عايزين شخص مختلف عن تقاليد الناس في هزاره وزعله،في عتابه قبل حُبه، يقدّر يعني إيه لحظة سُكات،شخص يبعد عن عُقدة الخواجة اللي رابط فيها كل لحظة حلوة بالفلوس،اتمسكوا بينا وقت زعلنا وما تخيّبوش ظننا فيكم.

اعرفوا كويس أوي جدًّا إننا لمّا بنقول عايزين نمشي بنبقى محتاجين إنكم تتبِّتوا أوي فينا، بنكون محتاجين نسمع منكم إن حياتكم هتقف ويومكم هيكون ناقص من غيرنا،بنكون محتاجين نشوف تعبيرات وِشُّكُم وإشاراتكم اللي بتقول لأ مش هينفع إنكم تسيبونا وتمشوا مهما حصل،محتاجين يكون بينّا احترام متبادل،احترام في الغياب قبل الحضور وده الواجب والأهم، محتاجين إننا ما نقللش من بعض قُدَّام الناس ولو بهزار،محتاجين نحس إننا بنحتمي في وجودكم وإنكم البيت اللي بنتدارى فيه وقت القلق والخوف،حسسونا بالأمان معاكم، هتلاقونا بيوت طارحة من الحنان جناحات،وسعة صدر لكل الكلام في آخر وقت النوم، محتاجين إننا نكون إحنا مش أنا وانتِ.
ads
ads
ads
<