شقيقة مراسل «فاهيتا» لأسرة البرنامج: 'على رأي باسم يوسف اخص على قلة الأصل'

هاجمت شقيقة شادى حسين، مراسل برنامج «أبلة فاهيتا»، أسرة برنامج «أبلة فاهيتا»، المذاع على قناة «CBC»، بعدما نفت صلتها بالفيديو الميسئ للشرطة، والذي قام بتصويره مراسل البرنامج.وقالت عبر حسابها الشخصي بموقع التواصل الاجتماعى «فيس بوك»، مساء اليوم الأربعاء: «كلمتين لبعض من أسرة برنامج أبلة فاهيتا والشركة المنتجة إنتو عارفين إن شادي كان بيعتبركم من عيلته لما كان بيتكلم عنكم؟ أكيد كان قصده على شوية ناس جوه اللي هما فعلا بيسألوا عنه دلوقتي ومتضامنين معاه، إنتو عارفين إن شادي مؤخرا كان شبه مختفي عن أصحابه وأهله عشان شغله معاكم لوقت متأخر ومشاركته بنفسه في كل خطوة في تقريره من الفكرة للمونتاج لحد ما يخرج التقرير في شكله النهائي اللي بيجيب أعلى نسبة مشاهدة على cbc عامة مش على فقرات البرنامج بس؟».وتابعت: «إنتو عارفين إن في ناس ابتدت تتفرج عليكم بس عشان تقارير شادي؟ فاكرين لما إنتو اللي كلمتوه وعرضتوا عليه يشتغل معاكم لما لقيتوه بيعمل تقارير لوحده وناجح فيها من قبل مايعرفكم؟ مش كان عاجبكم خفة دمه؟ كنتم فاكرينه بيضحك الناس وخلاص وهو كان بيوصل فكرة معينة.. شادي بتاع الكوميديا السودا اللي بيضحك بس بدموع.. شادي اللي عمل قيمة لبرنامج الناس كانت بتستخف بيه».وأضافت: «حقكم تعلنوا إنكم مش مسئولين عن اللي بيعمله ولا حتى متضامنين معاه، هو راجل شجاع وقلبه ميت وعنده أحلام فا مش أي حد مطالب يدعمه أو يتضامن معاه كنتم هتبقوا محترمين وهنقدركم أكتر لو اكتفيتم بأنكم تقولوا أن الفيديو مش خاص للبرنامج وإن دي حاجة شخصية وبس كده، بس لما تيجي منكم أنتم إنكم أصلا رافضين آخر فيديو ليه عشان فيه لا مؤاخذة "إساءات ومحتوى مسيء ينافي الآداب والأخلاقيات العامة ولا يتحلى بالمسئولية والاحترام"!! بعتوا الولد علطول كده! أنتم مدركين إن معظم الناس بتكرهكم واللي كانوا بيحبوكوا أنتم خسرتوهم بالبيان ده! وعلى رأي باسم يوسف "اخص على قلة الأصل"».وكان الفنان الشاب أحمد مالك، ومراسل برنامج «أبلة فاهيتا»، قاما بنشر فيديو ساخر من أفراد الشرطة المتواجدين بميدان التحرير، بعد أن قاما بنفخ «واق ذكري» على هيئة «بلالين» وإعطائها لأفراد الشرطة والتصوير معهم.