نشوى مصطفى: "ولا راعوا العشرة والعيش والملح اللي بينا" تنتقد ألم أسنانها بطريقتها الكوميدية

مازحت الفنانة نشوى مصطفى، متابعيها عبر حسابها الشخصي "فيسبوك"، عن ألمها من وجع الأسنان بطريقة كوميدية.

وكتبت" نشوى": "لما الغدر يجى لك من أقرب حاجة لروحك، لما هذا الغادر اللي كان مصاحبنى تقريباً خمسين سنة وكنت مستأمناه على حياتى يخونى ومش كده بس، ده تآمر عليا هو ومجموعة كبيرة من المحيطين بيه بمنتهى الخسة ولا راعو العشرة والعيش والملح اللي بينا وعمالين يطعنونى بخناجر فى راسى وقلبى وروحى، لما أحاول بكل الطرق إني اتجنب الالم اللي سببوه ليا بكل الوسائل اللي وصلت للمهدئات ويزودوا بمنتهى الغباوة الطعن المميت، تفتكروا اعمل ايه" .

وأضافت: "أنا خلاص قررت أخلعه من حياتي، ضرس العقل اللي فى الفك العلوى متزعم حركة تمرد فى بوقى ومقوم عليا كل الضروس والسنان أخدت كل ما امتدت إليه ايدى من مسكنات، كتافاست وبروفين 600، وبنادول وبرضو عمال يصرخ فى بوقى، ادعولي يهدى شوية لأني فعلياً ألم وجع السنان أصعب من ألم الولادة".

يذكر أن" نشوى مصطفى"، نشرت عبر حسابها الشخصي على موقع التواصل الاجتماعي فيس بوك، عن سبب تعرضها للاكتئاب في بعض الأحيان وأسباب اعتذارها عن الأعمال الفنية.

وكتبت : “حاحكى لكم حكاية على سبيل الفضفضة واسفة لو حازعجكم، بقالي فترة طويلة مش باشتغل التمثيل اللي اتمناه، اللي هو طموحي، واللي هو أنا لحد اللحظة دي مامثلتش طموحي، ولا حتى شبه طموحي، إلا في شوية أعمال يتعدوا على الصوابع ومنهم مثلًا المسرحية اللي كتبتها على مقاس احلامي في التمثيل، أقصد سيلفي مع الموت، ولأن الكلام ده كان من أربع سنين فاالتمثيل وحشني أوي”.

وتابعت: «كنت فاكرة أن أي شغل حيجى لى حوافق على طول، لقيت نفسى بيتعرض عليا ادوار باقراها واعتذر، وبعد ما اعتذر اقعد فترة مكتئبة والوم نفسى طيب ليه اعتذرت، فانفسى ترد تقول لى ماهو انتى ماحسيتيش انك حابة اللي قريتيه يومين تلاتة وانسى».