ريهام عبد الغفور: "عزا مها أبو عوف أقنع مريم بلون شعر الشخصية في وش وضهر"

بعد النجاح الساحق لمسلسل "وش وضهر"، حلت النجمة ريهام عبد الغفور، بطلة العمل، ضيفةً على الإعلامي عمرو أديب ببرنامج "الحكاية".

وذلك في حلقة الأمس من البرنامج، احتفالًا بنجاح المسلسل، حيث كشفت ريهام عن كواليس تحضيرها للشخصية.

وقالت: "مريم أبو عوف كانت بتصبغ شعري أصفر، بس ماكنتش حاسة إنه لسه بلدي كفاية للي في دماغها".

وأضافت: "صبغته تاني، لسه برضو هي مش مقتنعة، جات حكاية أستاذة مها أبو عوف الله يرحمها ويحسن إليها، فرحنا العزا".

وأشارت: "هي مريم صديقة لجوزي وفيه بينهم أصدقاء مشتركين كمان، فكله كان في العزا".

وتابعت: "فالصديقة المشتركة دي راحت قالت لمريم هي ريهام عاملة في نفسها كده ليه؟، هي ليه عاملة شعرها كده؟، مريم ساعتها اقتنعت إن شكلها بقى الحمد لله بلدي كفاية".

وأكملت: "عادي بقى هما قالولي اعملي شعرك أكسجين، وبعدين أنا قلتلهم طيب ok".

ولفتت: "هي حتى مريم لما دخلت اللوكيشن، وكنت أما صبغت شعري فعلًا، هي ماكنتش مصدقة إنه هيتصبغ".

وأوضحت: "بس أنا بالنسبالي دي حاجة عادية وطبيعية، لأن أنا في النهاية مهمتي إن أنا أوصل الحالة اللي هي عايزاها، واللي المؤلف عايزها للجمهور".

ونوهت: "فأيًا ما كان اللي هيطلبه المخرج مني، أو اللي هيتطلبه الدور مني إني أعمله عشان أوصل الشخصية، ده هيساعدني أنا شخصيًا".

وأكدت: "ببقى عايزة أعمله، عشان مبدئيًا كده الناس شكلًا هيصدقوا، وبعد كده الشخصية طبعًا مسئولية إن أنا أوصل لهم روح الشخصية".

يذكر أن النجمة ريهام عبد الغفور تشارك في مسلسلي "وش وضهر" و"منعطف خطر"، اللذين يعرضون على منصة "شاهد vip".