سوريا في مهب الريح.. اللواء رأفت الشرقاوي يوجه رسالة هامة

وجه اللواء رأفت الشرقاوي مساعد وزير الداخلية الأسبق رسالة هامة للعالم قائلًا:  لك الله يا سوريا ، ضاعت سوريا ، وضاع شعبك ، وضاعت ثرواتك ، والآن حان وقت توزيع التورتة، اللي بيحصل في سوريا دلوقتي كارثة غير مسبوقة ومأساة بمعنى الكلمة... بدأت الغارات الإسرائيلية فى ضرب قلب العاصمة السورية دمشق نفسها... وهناك أخبار عن تدمير مبنى وزارة الدفاع ومبنى الأركان، وحتى قصف القصر الرئاسي نفسه! ☐ وبالرغم من هذة الاهوال التى تحدث فى سوريا الا أن النظام السوري الجديد اللي ماسك الحكم في سوريا ما طلعش منه طلقة واحدة على إسرائيل ، بالعكس كان ساكت ومتقي شرها وسايبها تتوغّل زي ما هي عايزة من غير حتى ما ينطق بكلمة . ☐ النظام السوري الجديدة بقيادة (أحمد الشرع) بقاله كام يوم بيعمل عمليات أمنية في مدينة السويداء اللي بتحتوي جواها على أعداد كبيرة من طائفة الدروز اللي تعتبر أقلية في سوريا.. وده بعد ما حصل صراع بين الدروز وبين البدو هناك... وفي وسط العمليات دي حصلت تجاوزات وجرائم كتير في حق الناس هناك، بغض النظر هي من مين وضد مين... وده باختصار كبير لإن الموضوع كبير ومتشعب وواسع جدًا وداخل فيه صراعات طائفية ممتدة بقالها اكتر من 1000 سنة . ☐ اسرائيل من بداية سقوط نظام بشار وصعود نظام أحمد الشرع للحكم، وهي بتدعم علنًا طائفة الدروز السوريين، وبتقول انها هتدافع عنهم ضد "اعتداءات" النظام السوري الجديد... ومش بس كده.. ده الموضوع وصل لإنهم بيدعموا علنًا فصائل درزية وعصابات مسلحة في السويداء تحت شعار “حماية إخواننا الدروز”، وكمان بتوفرلهم تغطية جوية ضد تحركات القوات الأمنية السورية... لأن اسرائيل مش عايزة نظام سُني يسيطر على دمشق خالص... وده بردو مش معناه انها عايزة نظام علوي زي نظام بشار، ولا حتى عايزة نظام درزي... هما مش عايزين أي نظام مستقل في سوريا اصلا، ومش هيسمحوا بإن سوريا تخرج من تحت سيطرتهم اللي حققوها خلال الشهور الأخيرة بعد تدمير سلاح الجيش السوري بالكامل بعد سقوط نظام بشار... ☐ اسرائيل عايزه سوريا مفككة ومتقسمة لدويلات صغيرة طائفية بتتصارع مع بعضها... وعشان كده، الصهاينة دلوقتي بيلعبوا لعبتهم المميزة منذ بدء انشاءهم...بيستغلوا الانقسامات الطائفية (سنّة مقابل أقليات)، وبيستخدموا الدروز كورقة ضغط لضرب الجيش السوري والمؤسسات الأمنية وحتى الرئاسة نفسها، لمنع توحدهم واسقاطهم . ☐ اسرائيل ، ومن وراها أمريكا طبعًا، حاطة عينها على حاجة اسمها "ممر داوود"…وده عبارة عن ممر بري استراتيجي بيبدأ من الجولان اللي محتلاه إسرائيل، وبيعدّي على درعا والسويداء، لحد ما يوصل للتنف عند القاعدة الأمريكية اللي هناك، ومنه بيتوجه لحد مناطق الأكراد وبعدين كردستان العراق… وده مشروع كبير جدًا ، الهدف من المشروع ده هو انه يكون ممر يفتح لإسرائيل باب جديد على الخليج وآسيا الوسطى، ويوصلها بأوروبا من غير ما تحتاج تعدي من قناة السويس ، وبالتالي بالشكل ده تضرب النفوذ الجيوستراتيجي لمصر في مقتل، وكمان تقضي على طموحات مشروع الحزام والطريق الصيني اللي المفروض قناة السويس جزء كبير منه. ☐ السويداء بقى واقعة في قلب المشروع ده... وعشان كده أي قوة سنيّة أو أي جيش ممكن يشكّل خطر على الممر ده لازم يتسحق بدون تفكير وبدون ما ياخد أي فرصة، ومش مهم النظام ده حلو ولا وحش… ☐ المشكلة ان نظام احمد الشرع أو "الجولاني" زي ما كان لقبه قبل الرئاسة، لسه مش متماسك ولا عنده جيش حقيقي نظامي ولا سلاح نوعي أو طيران أو وسائل دفاع جوي وبطاريات صواريخ... كل اللي هو يمتلكه هو قوات غير نظامية كانت عبارة عن ميليشيات قبل ما يوصلوا لدمشق.. وعشان كده معندوش القدرة انه يحارب اسرائيل أصلًا، ده حتى قدرته على السيطرة على القوات بتاعته صعبة جدًا بسبب طبيعتها غير النظامية من الأساس...وبالتالي يحدث ما نشاهده الآن . ☐ إسرائيل شايفة إن اللحظة دي هي الفرصة الذهبية للتوسع والسيطرة على بلاد الشام كلها... ووزير الدفاع الاسرائيلي "كاتس" طلع بنفسه وقال :“انتهت الضربات التحذيرية… استعدوا للضربات الموجعة!"وحاليًا الموساد بدأ بالفعل تنفيذ اغتيالات لقيادات النظام الجديد، وفي نفس الوقت بيدعّم الفصايل الدرزية المسلحة ضد الجيش السوري الجديد، وبيغطيهم جوًّا! ☐ اسرائيل أصبحت عازمة على استكمال هذا المشروع ،مبقاش لازم تقصف إسرائيل أو تهددها عسكريًا علشان تعلن الحرب ضدك... ومش كفاية حتى إنك تهادنها وتسعى للتطبيع معاها علشان تتقي شرها... اسرائيل عندها هدف واحد مش هتتخلى عنه أبدًا...من النيل للفرات... وخلاص هما بدأوا التنفيذ. ☐ سحبت السلطات السورية قواتها بالكامل من محافظة السويداء في جنوب سوريا، بالتزامن مع إعلان الرئيس أحمد الشرع تكليف فصائل درزية مسؤولية الأمن وتنديده بالتدخل الإسرائيلي. ☐ "السويداء بدت خالية من القوات الحكومية، لكن الوضع كارثي مع وجود جثث في الشوارع" بعد ساعات من الإعلان عن اتفاق لوقف إطلاق النار في المدينة. وجاء في بيان لوزارة الدفاع السورية: "بدء انسحاب قوات الجيش العربي السوري من مدينة السويداء تطبيقاً لبنود الاتفاق المبرم، وبعد الانتهاء من تمشيط المدينة من المجموعات الخارجة عن القانون"، من دون أي ذكر لانسحاب قوات حكومية أخرى منتشرة في المدينة. ☐ للأسف سوريا لم تعد قوة تسطيع أن تفرض سلطانها على اراضيها أو شعبها ، ونجح مشروع الشرق الأوسط الجديد والربيع العربى فى تقطيع أوصال سوريا وشرذمة شعبها وأصبحت تحتوي على مليشيات من كل نسل وحدب ، وأصبحت سوريا يندى لها الجبين . ☐ وهنا نقول للشعب المصرى ، المشهد أصبح واضح ولا يحتاج الى شرح ، فلم يعد بمنطقة الشرق الأوسط دولة سوى مصر وجيشها وشعبها فحافظوا عليها فبدونها لا نساوى شئ ، بلادي وإن جارت على عزيزة وأهلي وإن ضنوا على كرام . ☐ حفظ الله مصر وشعبها وقائدها وجيشها ورجال امنها وكافة المخلصين من ابناء هذا الوطن وجنبها شر الفتن والاحقاد والشائعات والضغائن والحروب ، اللهم إنى استودعك مصر وأهلها أمنها وأمانها ، ليلها ونهارها ، أرضها وسمائها ، فاحفظها ربى يا من لا تضيع عنده الودائع .