برسالة صوتية.. ماذا قالت أنغام لجمهورها؟
نشرت الفنانة أنغام رسالة صوتية، على موقع التواصل الاجتماع الرسمي “فيسبوك”، وجهت فيها الشكر لجمهورها بعد أن تعرضت لمشكلة صحية في الفترة الأخيرة.
رسالة أنغام لجمهورها
وقالت أنغام، عن دعم جمهورها لها: "أنا فكرت أكتب ولا أتكلم بصوتي، وحسيت إنه أنا محتاجة أتكلم معاكم بصوتي وأقول لكل حد وقف جنبي، لكل حد دعالي من قلبه، حتى اللي مكنش بيحبني وقرر بإنسانيته إنه يدعمني.. بشكركم من كل قلبي، وإنتوا دعيتوا وربنا استجاب ودعاءكم كان هو الدوا وهو الإيد اللي بطبطب وهو اللي وقفني على رجلي بعد ربنا وبعد الدكاترة".
وتحدثت النجمة أنغام، عن أصعب ما عاشته خلال فترة مرضها، وخوفها الأكبر على أولادها: "أنا كان كل خوفي إني أسيب ولادي.. وأنا مكنتش عايزة حاجة من الدنيا غير إني أرجع لولادي ونفسي أكمل معاهم شوية.. أنا عديت بمحنة صعبة جدًا بس بشكر ربنا اللي حط في قلوبكم المحبة والدعاء اللي ساعدني أرجع أقوى".
كما وجهت أنغام الشكر، لفريقها الطبي الذي رافقها خلال رحلة العلاج: "مش هقدر أقفل الرسالة دي قبل ما أشكر أستاذ دكتور أيمن أغا العربي الفلسطيني اللي أجرى العمليات، وكان بعد إيد ربنا السبب في شفايا، وكمان أستاذ دكتور محمود مجيدا اللي كان متابع حالتي من البداية وأنا في ألمانيا لحظة بلحظة".
وحرصت أيضًا على توجيه الامتنان لأسرتها وأصدقائها المقربين، قائلة:"بشكر ولادي عمر وعبد الرحمن، وبشكر أمي على دعائها ليا، وأصحابي وأخواتي راندا ويمنى وعادل.. وكلامكم الحلو ودعواتكم كانت دوايا الحقيقي".
وفي ختام رسالتها أكدت أنغام شوقها الكبير للقاء جمهورها على المسرح من جديد:
"أنا مشتاقة جدًا إني أشوفكم قريب ونغني ونحتفل سوا.. وربنا يجعل أيامكم بركة وصحة وخير".