رئيس اتحاد الكاراتيه: عودة بطولة العالم للقاهرة بعد ٣٧ عاماً إنجاز تاريخي لمصر

أكد محمد الدهراوي، رئيس الاتحاد المصري للكاراتيه، إن استضافة مصر لبطولة العالم للكاراتيه بعد غياب ٣٧ سنة عن القاهرة مش مجرد حدث رياضي كبير، لكن خطوة تاريخية بتعيد مصر لمكانها الطبيعي بين كبار الدول المنظمة للبطولات العالمية. 

وقال إن البطولة دي من أضخم الفعاليات اللي استضافتها مصر في السنين الأخيرة، سواء من حيث عدد اللاعبين أو حجم الدول المشاركة.

وخلال ظهوره مع الإعلامي محمد طارق أضا في برنامج "الماتش" على قناة صدى البلد، أوضح الدهراوي إن كتير ماكانوش متوقعين إن مصر تحصل على حق تنظيم البطولة، لكن الملف اللي قدمه الاتحاد المصري كان احترافي جدًا وقدر يقنع الاتحاد الدولي إن القاهرة جاهزة ترجع على الساحة بقوة.

وأضاف: "اللي بنعمله النهاردة بيرجع مصر لمكانها الطبيعي كدولة رائدة في تنظيم البطولات العالمية."

و شدد الدهراوي إن نسخة 2025 من بطولة العالم للكاراتيه تعتبر استثنائية في كل التفاصيل، ومش مبالغ لما يتقال إنها شبه الدورات الأولمبية من حيث عدد المشاركين وحجم الدول اللي جاية، وده حط على عاتق الاتحاد مسؤولية ضخمة في إن كل حاجة تطلع بأفضل صورة.

وقال إن ضخامة الحدث فرضت استعدادات كبيرة ومكثفة علشان يضمنوا إن التنظيم يظهر بشكل يليق باسم البلد.

وأشار كمان إلى إن الاتحاد بدأ الشغل فور الإعلان عن استضافة البطولة، وتم تجهيز خطة تنظيم كاملة متقسمة على مراحل، بداية من استقبال الوفود بشكل محترف، لحد توفير كل الخدمات اللوجستية والنواحي الفنية جوه الصالات حسب المعايير اللي بيحددها الاتحاد الدولي. وأكد إن الهدف إن الضيوف يشوفوا قد إيه مصر قادرة تقدّم نموذج تنظيمي عالمي.

وعن استعدادات المنتخب المصري للمنافسات، قال الدهراوي إن اللاعبين جاهزين كويس جدًا بعد فترة إعداد قوية، وإن عندهم طموحات كبيرة يحققوا ميداليات قدّام جمهورهم وعلى أرضهم. 

وكشف إن الجهاز الفني حاطط خطة شاملة تضمن إن مستوى الأداء يكون ثابت ومناسب لقيمة البطولة، خصوصًا إن اللعب في القاهرة بيحمل مسؤولية إضافية لكن في نفس الوقت بيدي دافع كبير.

وفي نهاية كلامه، عبّر رئيس الاتحاد عن ثقته الكاملة في قدرة لاعبي المنتخب على التتويج بعدد كبير من الميداليات، وقال إن النسخة دي مش مجرد بطولة، لكنها محطة مهمة هتثبت للعالم إن مصر قادرة دايمًا تكون في المقدمة سواء في الاستضافة أو المنافسة.