الرقص مش رخيص.. دينا دياب توضح رسالتها للجمهور| فيديو

تحدثت الفنانة دينا دياب عن الفيديوهات التي انتشرت لها وهي ترقص والتي حظيت برواج كبير وتعليقات واسعة من الجمهور والفنانين على حد سواء.

وأكدت دينا دياب خلال لقاء مع ET بالعربي أنها لم تتوقع هذا التفاعل الكبيرقائلة: "الفيديو دا أنا مكنتش متخيله إنه هينتشر بالانتشار الكبير دا، انتشر في دول برا مصر وفي الوطن العربي لأن مجتمع الراقصين منتشر في العالم كله في الأصل أنا برقص في مكان في وسط البلد اسمه استديو سمارة دا المكان اللي بنتمي ليه حاليًا".

وتابعت: "زمان مكانش في اهتمام إني أستعرض جسمي على قد ما أنا عايزة أنقل حالة أوريك باستعراضي دا بكل جوارحي وحركات جسمي أوريك فن. الرقص زمان كان شيك ومحترم متحسيش باشمئزاز وانتي بتتفرجي عليه وكان فيه رقي".

وكشفت دينا عن قلقها قبل نشر الفيديوهات لكنها فوجئت بردود الفعل الإيجابية: "كنت خايفة الناس متتقبلنيش بس لقيت اللي شافوا الفيديو شايفين اللي أنا شايفاه وحاسين اللي حساه وشايفين إنه مش ابتذال واستقبلوني بقبول وحب مكنتش مصدقة وكنت بحلم بتعليقات جميلة من ناس عادية وفنانين ونقاد".

وأوضحت أن هدفها الأساسي من البداية كان توصيل رسالة للجمهور أن الرقص ليس ابتذالًا بل هو فن مصري قديم قائلة: "كنت بتمنى أقول للناس إن الرقص المصري أو الشرقي مش حاجة وحشة، ولا هو رخيص دا فن موجود في تراثنا من سنين وكان نفسي أكون الشخص اللي يقدر يرجع دا ومصر مليانة مواهب من بنات وفنانات بيرقصوا حلو".