محمد فراج يعتذر لأسرة ضحية طفل شبرا: "آسفين لأننا فكرناكم بالوجع دا"
حرص الفنان محمد فراج على توجيه رسالة مؤثرة إلى أسرة ضحية القضية الحقيقية التي تناولتها حكاية "لعبة جهنم" ضمن أحداث مسلسل "القصة الكاملة" معربا عن اعتذاره لهم لإعادة فتح جرح القضية وتذكيرهم بالألم الذي عاشوه.
وقال محمد فراج خلال لقائه مع ET بالعربي: "بقولهم إحنا آسفين قبل أي حاجة إحنا رجعنا فكرناكم بوجع الوقت دا، دا قضاء ربنا وقدرة وفي الآخر يهمني جدا أن رسالتي تبقى لكل الناس خدوا بالكم من عيالكم".
وأضاف محمد فراج: "مش بمعنى أنكم تخنقوا عليهم لأن دا يؤدي لنتيجة مش كويسة خدوا بالكم بحنية وصراحة ونقدر نقضي أكبر وقت معاهم يبقى فيه من المتعة والانبساط ومن الصراحة والحميمية عشان العلاقة تتبني بشكل سليم ومهما اتحطوا في مواقف هيبقوا واثقين أنهم هيطلعوا منها بشكل سليم، لأن للآسف الشديد بقينا في وقت صعب جدا ومخيف، ربنا يحرس أطفالنا وعائلتنا ولا يوجع قلب أي حد على طفل ليه".
محمد فراج يكشف كواليس نجاح "لعبة جهنم"
وتحدث محمد فراج عن ردود الفعل التي حققتها الحكاية، مؤكدًا أن تقديم واحدة من أشهر وأعنف القضايا التي شهدتها مصر خلال السنوات الأخيرة كان تحدي كبير لفريق العمل.
وقال: "الحمد لله رب العالمين كرم وفضل من ربنا النجاح اللي بحسه أنا وكل طاقم العمل لأن الموضوع كان تحدي أن ناخد قضية من أشهر وأعنف القضايا اللي حصلت في مصر السنوات الأخيرة ولما تيجي تتحول لعمل فني الجريمة كانت عبارة عن إيه وشرحها وطريقة التعامل بين الضحية والأشخاص التانيين في عوامل ممكن تبقى قاسية على الجمهور في نفس الوقت لأشخاص اللي هما ضحايا في القضية دي الطفل وقعها كان تقيل خصوصا لما تتقدم بصدق وصح أكيد هنفكر الناس بمعاناة نفسية دي حاجة كنا عاملين حسابها لكن إحنا بنوصل رسالة مهمة للناس كلها عشان لو في حاجة حصلت غلط ناخد بالنا".
محمد فراج يكشف تفاصيل تحضيره للشخصية
وكشف محمد فراج عن الطريقة التي بدأ بها التحضير لشخصيته في العمل وأنه كان قد تابع القضية وقت وقوعها لكنه لم يكن على دراية بكل تفاصيلها وهو ما زاد من حماسه لخوض التجربة.
وقال: "تابعت القضية وقت ما حصلت بس مكنتش عارف كل تفاصيلها لما الموضوع اتعرض عليا مأخدتش وقت خالص لأنه كممثل حاجة فيها تحدي ودي حاجة أنا بحبها في شغلي، أنا بحب أتلون ودي مش رغبة سهلة دي حاجة متعبة جدا وصعبة في تحقيقها محتاجة مجهود وفرجة وخيال لما بعمل حاجة بعيدة عني دا بيدي فرحة بعمل حاجة مختلفة، أنا بدرس الشخصية على قد ما هي موجودة في السكريت وببدأ اشوف هطلعها إزاي حركتها ومشيها أنا باخد كلام مكتوب على ورق وبحولها للحم ودم".
تفاصيل حكاية "لعبة جهنم"
وتتناول حكاية "لعبة جهنم" قضية "الدارك ويب" التي أثارت جدلًا واسعًا خلال العامين الماضيين، وتدور أحداثها حول جريمة قتل طفل صغير، ارتكبها شاب بالاتفاق مع طفل آخر، قبل أن تتطور الجريمة إلى تقطيع جثمان الضحية ومحاولة الاتجار بأعضائه، إلى جانب تصوير الواقعة ونشر الفيديو عبر "الدارك ويب".
ويأتي مسلسل "القصة الكاملة" في 5 حكايات منفصلة، تتكون كل حكاية منها من 3 حلقات، على أن تُعرض حكاية واحدة كل شهر.
وتضم بطولة حكاية "لعبة جهنم" محمد فراج، وعمر رزيق، والطفل منذر مهران، وغادة طلعت، وكريمة منصور، وياسر عزت، والعمل من تأليف نجلاء الحديني، وإخراج إسلام خيري.