ربة منزل في دعوى خلع: "بيمنعني أقعد مع جارتي"

أقامت هدى عبد الله، ربة منزل، دعوى قضائية أمام محكمة الأسرة بالتجمع الخامس في القاهرة الجديدة، طالبت فيها بالخلع من زوجها "حسين.م"، بعد استحالة العشرة بينهما، قائلة: "حسين اللي اتجوزته، مش هو اللي حبيته"، موضحة أنها تزوجته بعد قصة حب دامت لعامين.

واستطردت كلامها: "أنا ما كنتش أعرفه قبل ما يطلبني من بابا، ولما وافقوا عليه في البيت، اتخطبنا سنتين، حبيته، حنيته وطيبة قلبي علقوني بيه، ما كانش بيرفضلي طلب، واتمنيت يجمعنا بيت واحد عشان أعرف أسعده".

وأكملت بعد تغيير نبرة صوتها لتدل على مدى الحزن الذي جال بخاطرها فور تذكرها لشيء ما: "من أول يوم اتجوزنا فيه وهو متغير معايا، بطل يهتم بيا، وبيغيب في شغله كتير، ساعات قليلة اللي بيقعدها في البيت، ولو جه بدري ينزل يقعد مع صحابه ويسيبني، أنا مليت وكل ما أتكلم معاه، يزعقلي ويقولي دي حياتي ولو كان عاجبك".

وتتابع: "اتعرفت على جارتي في نفس العمارة، وبقيت أقضي معاها اليوم طول ما حسين في الشغل، ما كملناش سنة متجوزين وسايبني لوحدي، ولما بلجألها واحكيلها تيجي في شقتي وأروحلها أحيانًا، جوزها ظروف شغله بتخليه يغيب كتير، وحاسيت إننا مالناش إلا بعض، وبنهون على بعض، جه مرتين ويلاقيها عندي في البيت، ويضايق، وقالي لا هي تيجي ولا أنا أروحلها، عايز يجنني ويخليني أكلم الحيطان".

وتوضح "هدى" أنها بعد محاولات عديدة فشلت في استقرارهما معًا، وجعله يهتم بها وبالجلوس معها أكثر، طلبت منه الانفصال لكنه رفض، فقررت رفع دعوى خلع منه بمحكمة الأسرة، والعودة لبيت أبيها ببولاق الدكرور مرة أخرى.