بدعم الرئيس.."مارينا": "مستورة" حقق حلمي وفتحت مصنع ملابس والحال بقي تمام

في الصباح الباكر، كانت تتجه إلى ركن صغير لاتتعدى مساحته الـ 5 أمتار، لتحيك بأطراف أناملها بإبرة الكورشيه، لتغزل مفرشا كبيرا أرادت سيدة أن تضعه على منضدة الطعام، فقد رزقها الله بيتا واسعًا ووهبها المال الكثير.

غرزت الفتاة الإبرة، وانزلقت الواحدة تلو الأخرى في سلاسة، وانتهت منه بعد 24 ساعة متواصلة، وعيناها تريد أن تغفل وترى حلمها التي يهون عليها وجع الحياة، ولكن ما باليد حيلة فمتطلبات الحياة لم تساعدها على ذلك.

المشهد يتكرر يوميًا لمدة أسبوعين ونصف الأسبوع، لتخرج صنع يديها الفريد من نوعها "المفرش" إلى النور.

"مارينا رأفت"، مقيمة بمدينة شبرا الخيمة، محافظة القليوبية، تقول: "اتعلمت التفصيل من صغري، واتعلمت لحد لما ربنا كرمني بماكينة في البيت، بشتغل عليها وبفصل للزباين اللي كانت بتجيلي، ولما لقيت مصاريف أخواتي كثيرة، كنت بدور على حل عشان أكبر مشروعي".

"وبعد معاناة، تعرفت على ولاد الحلال اللي عرفوني على بنك ناصر الاجتماعي، اللي جبولي ماكينات وفتحت ورشة صغيرة، وبقيت أنزل كل يوم الصبح، وبقت الدنيا تمام".

"مخدتش فلوس في إيدي".. كيف استطاعت "جيهان" تربية وتعليم أولادها؟

وأكملت: "قبل ما افتح مشروعي، مكنتش بلاقي جنيه في البيت وكنت استنى وادعي ربنا واقول يارب زبونة تجيلي، لحد لما الفلوس والديون اتجمعت فوق رأسي، ومبقتش عارفة أعمل إيه، غير إني أسأل الزباين والجيران على أي مساعدة، وولاد الحلال دلوني على مشروع مستورة، وفعلا ستروني ربنا يسترهم في الدنيا والآخرة".

"دلوقتي عندي مصنع كبير، وبقيت بنفع غيري، وبنات زي الفل بتيجي تشتغل معايا وبيقبضوا كل شهر، وحلمي الأيام الجاية إنى اكبر محلي وأخذ قروض تاني، عشان اشتري قماش وأوزع للمحلات والمصانع، وده اللي هعمله إن شاء الله الفترة الجاية".

وتابعت: "ياريت كل ست عندها فكرة لمشروع، متتردش وتروح تكبر مشروعها ومتخفشي من موضوع القروض، عشان الميزة اللي في قروض بنك ناصر إنه مبيخدش فلوس، وبيقف معانا، وبييجي كل 10 أيام مع لجنة الزكاة يتابع شغلنا ويشوف مشاكلنا، وعلى طول بيحلهالنا، وبيصبر علينا لحد لما المشروع يكسب، وندفع الأقساط بتاعتنا".

جدير بالذكر، أن قرض مستورة التي حصلت عليها"مارينا" يأتي في إطار تحقيق تكليفات السيد عبدالفتاح السيسي رئيس الجمهورية و التي تستهدف الاهتمام بمحدودي الدخل و العمل على الارتقاء بمستوى معيشة المواطنين وحماية الفئات الأكثر احتياجًا وتمكين المرأة اقتصاديًّا بتوفير فرص عمل لها.