بعد القبض عليه.. عمرو أديب يحكي عن سمكري بني آدمين أغلب زباينه من المشاهير وبيعالج بـ"الطأطأة"

طالب الإعلامي عمرو أديب نقابة الأطباء بالتدخل لوضع حد لحالة "سمكري البني آدمين" والحالات المشابهة، في مزاولة علاج المرضى بدون مؤهلات.

وخلال تقديمه حلقة اليوم من برنامج "الحكاية" على قناة MBC مصر، قال عمرو أديب: "عدد كبير من المشاهير المصريين يتم علاجهم بالطقطقة، وطبعا الراجل ده تم القبض عليه اليومين اللي فاتوا، لإنه طلع لا يحمل أي شهادات، وهو كاتب على باب العيادة بتاعته سمكري البني آدمين. طبعا كل ده بفيديوهات موجودة منشورة، تحت سمع وبصر الجهات الطبية المصرية."

وأضاف: "ده نموذج في زيه مئات يعالجون الناس. هذا الأمر كفاية، وإحنا موجودين في القرن الـ 21 الأشياء دي لازم تتوقف، دي صحة الناس يا جماعة. أنا مش عايز أتكلم في السوق الكبير لعلاج البواسير والأمراض الجنسية، كل هؤلاء ليسوا أطباء ، فين يا جماعة دور نقابة الأطباء."