هاجر الشونوبي: بحب السقا أوي.. وبقى اسمي فُلة (حوار)

هاجر الشرنوبي في حوار لـ «بلدنا اليوم»:السقا ملتزم وباحبه أوى.. وفراج بيخلينى تلقائيةماحدش خدمنى فى عيلتى.. وعملت كل حاجة بنفسى المخرج بيتر ميمى هو اللى رشحنى لمسلسل «كلبش»الناس دلوقتى بينادونى بـ«فلة» بعد نجاحى فى «كفر دلهاب» الشريف وإنجى بيكملوا بعض وبيساعدوا الممثلين تخرجت فى فنون مسرحية قسم تمثيل وإخراج، واعتمدت على نفسها فى الحصول على فرصتها، وقادتها الصدفة للوقوف أمام الفنان القدير عمر الشريف، واستطاعت أن تفرض نفسها على المخرجين بفنها الراقى، فرشحوها لأعمال مهمة منها «كلبش» و«الحصان الأسود»، وحققت نجاحات أبهرت الجميع، خاصة شخصية فلة فى "كفر دلهاب"، إنها الفنانة هاجر الشرنوبى، التقتها «بلدنا اليوم» فى هذا الحوار. فى البداية عرفينا عن نفسك ومين رشحك كممثلة؟أنا اسمى هاجر الشرنوبى من إسكندرية، تخرجت فى فنون مسرحية، قسم تمثيل وإخراج، أنا باحب التمثيل من وأنا صغيرة، وكنت دايمًا باقلد الأفلام فى المرايا، ولما كبرت دخلت المعهد وابتديت فى مشوارى واشتغلت شوية وأنا فى المعهد، وبعدين بطلت تمثيل وكملت فى كلية آداب علم نفس، وعملت دبلومة وبعدين رجعت تانى. لماذا توقفت عن التمثيل؟حاسة إنى يائسة، ومش عايزة أقول الكلمة دى لأن اليأس مش فى شخصيتى، كان الموضوع فى الأول صعب إن نروح نقابل مخرج، وأنا باحب التمثيل ومش عارفة ابتدى منين، وبعدين رجعت تانى، وعملت فيلمين وكنت باسافر إسكندرية واجى، وبعدين قررت إنى أركز شوية فى الحاجة اللى باحبها، وفعلا ابتديت السنة دى، وأول حاجة مضيتها كان مسلسل الحصان الأسود. اترشحتى إزاى لمسلسل الحصان الأسود؟أول ما جيت القاهرة شوفت المخرج أحمد خالد، وقلتله عايزة أروح أعمل اختبار التمثيل قالى رقمك مع خلود، وأنا فعلا ماصدقتش إن الموضوع سهل، مش زى زمان كان صعب توصلى لمخرج أو تتكلمى معاه، زمان ماكناش بنعرف نوصل للمخرج خالص، أو إنك تلاقى قدامك مخرج، وفعلا عملت اختبار التمثيل والحمد لله ربنا كرمنى بالحصان الأسود، وبعد الحصان الأسود علطول كلمنى المخرج بيتر ميمى، وأنا كنت عاملة معاه فيلم اسمه «برد الشتا»، وهو اللى رشحنى لمسلسل «كلبش». وعن مشاركتك فى "كفر دلهاب" ومين اللى رشحك للمسلسل؟"كفر دلهاب" جه بالصدفة البحتة، أستاذ أحمد نادر جلال كان بيدور على فريق عمل معين، وأنا كنت عاملة اختبار تمثيل عنده فى المكتب، ومن خلاله اختارنى أشارك فى المسلسل، وأنا باتعاقد على "كفر دلهاب" ماكنتش عارفة الدور، كل اللى كان شاغلنى إنى كنت عايزة أشتغل مع أحمد نادر جلال.كلمينا عن دورك فى مسلسل «كفر دلهاب»؟أنا جسدت شخصية فلة اللى بتعمل شبح ريحانة وشبح كريمة، وفلة دى كانت لغز المسلسل كله، أنا باحب الشخصية دى قوى وماكنتش متخيلة إنه حقق النجاح ده، حتى الناس فى الشارع دلوقتى بيقولولى فلة، كانت الناس كل اللى شغلهم من يوم 21 رمضان، كانوا بيقولوا هو مافيش شبح ومافيش لعنة، يعنى اللى عاملة الموضوع ده كله واحدة اسمها "فلة" متفقة مع يوسف الشريف متربية معاه ومتفقة إنها تمثل على الناس وفضلت الناس تسأل مين فلة، أنا كنت قلقانة من اول رمضان إن الناس ماتبعش فمش حتبقى عارفة إن دى أنا، بس الحمد لله ربنا خيب ظنى ومن يوم 21 رمضان كان فيه أكتر من 5 ملايين عايزين يعرفوا مين فلة دى، وكان فى بوست نازل يعنى إيه بعد 21 حلقة متشكر يا فلة، وكمان جمهور يوسف الشريف كتير جدا وأنا فعلا كسبت كل جمهوره. ولكن ولاء الشريف هى اللى كانت تجسد دور ريحانة، وصورت 70 % من المسلسل؟ 79% ده مش حقيقى، لأن أنا ظهرت من الحلقة التاسعة وهى بتقول إن أنا باظهر من الحلقة 21 مافيش الكلام ده، لأن من الحلقة 21 شبح ريحانة بيخلص، هى ولاء اختلط عليها الأمر، لأنها تركت المسلسل من شهر 12. كلمينى عن يوسف الشريف؟يوسف الشريف شخص محترم جدا، بصراحة هو وإنجى على زوجته هما الاتنين بيكملوا بعض وبيساعد الممثل اللى قدامه وبجد من الشخصيات المحترمة فى الوسط الفنى.مين اللى كان رافض من أهلك دخول الوسط الفنى؟ بابا، مع إن عائلته كلها فى الوسط، قالى لا وحتسافرى القاهرة، فقاللى عايزة تدخلى المعهد، طيب لازم تدرسى حاجة كمان وفعلا سمعت كلامه ودرست المعهد وبعدين آداب علم نفس.عيلة الشرنوبى عيلة فنية بامتياز ماحدش ساعدك فى دخول الوسط الفنى؟أنا ماعتمدتش أصلا، إنى أقول لحد رشحنى فى عمل خاصة إن مجالهم مختلف عن مجالنا، فالتلحين غير التمثيل، ومحمد الشرنوبى كان لسه بيبتدى، فأنا ماعتمدتش على حد خالص من العيلة أنا كل حاجة عملتها بنفسى.كلمينا عن وقوفك أمام الكاميرا لأول مرة؟أول مرة أقف قدام الكاميرا كان قدام عمر الشريف فى مسلسل "حنان وحنين"، وكنت باهزر كانوا بيصوروا فى إسكندرية وكنت رايحة مع واحدة صحبتى ممثلة، وكنت رايحة علشان أشوف عمر الشريف، فدخلت للمخرجة إيناس بكر الله يرحمها، فشافتنى وقالتلهم أنا عايزة البنت دى وعملت فى المسلسل دور زوجة طارق النهرى، فرحت أوى إنى حامثل قدام عمر الشريف وكان متواضع جدا مع كل الناس.كلمينا عن مسلسل الحصان الأسود؟مسسلسل الحصان الأسود كان أول حاجة أتعاقد عليها، أنا كنت خايفة جدًا فى أول يوم تصوير، لأن كان عندى مشاهد كتير قدام محمد فراج وانا كان أول مرة أشوف فراج، وكان بقالى كتير ماوقفتش قدام الكاميرا فكنت خايفة، لكن كان المخرج أحمد خالد موسى أستاذ فى الطاقة الإيجابية، وكنا كلنا فى كواليس العمل بنحب بعض، وكنا كلنا أصحاب جدا جوا الشغل وبره الشغل، وكان أحمد السقا كان بيبقى أول واحد موجود فى التصوير وملتزم جدًا، وكان بيتعامل مع أصغر واحد لأكبر واحد عامل زى أخونا الكبير. لماذا قولتى إن أحمد السقا حقق كل أحلامك؟أنا ماكنتش أحلم إنى أقف قدام أحمد السقا، أنا باحبه جدًا كان فعلا من أحلامى إنى أشتغل مع أحمد السقا فماكنش مصدقة، الحمد لله السنة دى فى أحلام كتير كان نفسى فيها اتحققت.كان فى مشاهد كتير بينك وبين محمد فراج كلمينا على التعاون معاه؟فراج عنده طريقة يخليكى تلقائية وهو شخصية جميلة جدًا.اشتغلتى مع أحمد العوضى فى مسلسل الحصان الأسود خطوبته كانت من فترة تقوليله إيه؟أقوله ألف ألف مبروووك وربنا يتمملك على خير، وربنا يكرمكم وعقبال الفرح، فضحكت قائلة: كل البنات زعلت يا عوضى. كلمينا عن دورك فى مسلسل كلبش ومين اللي رشحك؟رشحنى لمسلسل كلبش الدكتور بيتر ميمى، دورى فى المسلسل كنت باجسد شخصية نورا وهى بنت بسيطة جدًا، وكان بيحصلها نقلات كتير فى حياتها، أخوها بيتسجن وخطيبها يموت، بجد أنا خلصت كل دموعى فى الشخصية دى.معظم مشاهد مسلسل كلبش كانت بتجمعك بـ"محمد دياب" كلمينا عنه؟دياب الناس كرهته فى المسلسل بسببى بس هو مش كده خالص، هو دمه خفيف جدًا، أول ما المخرج يقول أكشن دياب يستعد لشخصية زناتى، ولما يقول استوب يطلع من الشخصية بسرعة، أنا فاكرة إن إحنا صورنا مشاهد الخطف فى رمضان كنت صايمة وكانت أيام صعبة جدًا.شاركتى فى فيلمين «خطة بديلة» و«برد الشتا».. شايفة التركيز على الدراما أكتر من السينما؟أنا كنت لسه باقول لمحمد الشرنوبى من فترة أنا علطول بيتعرض عليا أفلام، فيقولى دى الأفلام مهمة الناس بتعمل مسلسلات وبعدين بيبقى نفسها تعمل أفلام، فأن قولتله إن انا عايزة الناس تعرفنى الاول وبعدين أعمل افلام، فطبعا كل مسلسل بيبقى نفسه يكون نجم شباك، بسس المسلسلات بتدخل كل البيوت، بالذات فى رمضان كل الناس مستنية تتابع نجومهم المفضلين زى أحمد السقا، وأمير كرارة، وسمية الخشاب كل حد محدد حيتابع إيه، بس أكيد السينما ليها طعم مختلف، لكن الأسهل والأسرع فى الانتشار الدراما أكيد.ما أعمالك القادمة؟صورت «سرايا حمدين» و«أفراح إبليس» الجزء التانى بظهور خاص من خلال شخصية نادية، وخلصت تصوير وطلعت على المستشفى بسبب مشهد عنف مع تامر ضياء، وجبت دم ودوخت واتعالجت، وبعدها اتاسفلى المخرج أحمد خالد امين. اختيار أدوارك على أى أساس؟باختار المسلسلات بناء على الارتياح النفسى، واكون مرتاحة للدور حتى لو كلمتنى زى شخصية نورا فى مسلسل كلبش. لو اتعرض عليك دور إغراء توافقى عليه؟لا مش هاعمله، فيه ناس ناجحة جدا فى الموضوع ده، وبيصنفوها صح مع كامل احترامى ليهم، والناس لما قابلونى قالولى بلاش إغراء خليكى كده شبهنا، وقالت ضاحكة: لكن لو مع جون ديب أنا ممكن أوفق على الإغراء.ما الدور اللى نفسك تمثليه؟أنا باحب سعاد حسنى أولا، كان نفسى أقدم شخصية سعاد حسنى فى فيلم «خلي بالك من زوزو» وشخصية ميرفت امين فى فيلم «حافية على جسر الذهب».