رسالة مؤثرة وحزينة لأحمد حسن كوكا بعد وفاة أبيه

نشر اللاعب أحمد حسن كوكا مهاجم المنتخب المصري صورة جديدة له مع والده وذلك عبر حسابه الشخصي على موقع تبادل الصور والفيديوهات " انستجرام ".

وكتب كوكا على الصورة قائلا: " اللي هقوله ده ناس قليلة تعرفه عشان أنا مش بحب اتكلم في حياتي الشخصية، بس أنا والدي ده من غيره أنا مش حاجة ولا عمري كنت هبقي حاجة ولا أحقق أي حاجة، بابا الله يرحمه من وأتا عندي ٦ سنين وداني النادي الأهلي، كان اكبر حلم له اني اطلع لعيب كورة و يفتخر بي قدام أهله و صحابه، وعلي طول معايا في التمارين و الماتشات و لما يكون عنده شغل و مايعرفش يحضر بيخلي حد يصور الماتش عشان يتفرج عليا بعد كدة، ايوه حبه لي و انه يشوفني بلعب كورة كان حاجه تانية، كبرت و جالي عرض احتراف و هو على طول في ضهري، قال لي قبل ما اسافر كلمتين مش هنساهم لاخر يوم في حياتي ( عايزك ماترجعش مصر غير وانت مشرفني بره عايز افتخر بيك وسط اهلي ) قلت له ان شاء الله يا بابا ".

وتابع قائلا :"سافرت و في اول شهر ،نزلت التمرين و لما رجعت كان في مطافي و بوليس كتير عند بيتي، فبصيت لاقيت شقتي كلها بتتحرق، كل حاجه كانت عندي في الشقه راحت، كلمت بابا و قلت له انا عايز ارجع مش قادر علي الغربة و اللغة صعبة و بعد اللي حصل ده يمكن ربنا مش رايد اني اكمل هنا، قال لي أنا بكرة الصبح هجيلك. بابا تاني يوم كان عندي و جايب لي لبس جديد كتير و اداني فلوس عشان اجيب اللي عايزه و قال لي أنا جيت عشان افكرك أنك مش هترجع غير لما تشرفني و تشرف بلدك، انت فاكر انها سهله ؟ الي حصل ده يقويك مش يخليك تستسلم".

وأنهى حديثه قائلا :" الحمد لله علي كل حاجة بس انا من غير والدي ماكنتش كملت، الله يرحمك يا اطيب واحن وارجل انسان شوفته في حياتي، كان نفسي تبقي معايا و تفرح بي، ان شاء الله نتجمع تاني في الجنة."

وجاءت التعليقات علي الصوره كالتالي :

- ربنا يرحمه

- انت لاعب شاطر و مجتهد

- و انت فعلا شرفته ورفعت راسه

وانضم كوكا لصفوف نادي أولمبياكوس في الميركاتو الشتوي الماضي، قادمًا من نادي سبورتينج براجا البرتغالي، على سبيل الإعارة لمدة 6 أشهر، وتوج معهم بشكل رسمي بلقب الدوري اليوناني.

وحسم نادي أولمبياكوس مباراة كريت لصالحه بفوزهم بثلاثية نظيفة، ضمن منافسات الجولة الخامسة والثلاثين لبطولة الدوري اليوناني.

‎موضوعات ذات الصلة

عودة "الشامي" وتدريبات خفيفة لعبد الرحمن مجدي في مران الإسماعيلي

أبرزهم راكيتيتش وفيدال.. مذبحة داخل برشلونة برحيل ١٢ لاعب