تامر حسني يكشف أحدث تطورات الحالة الصحية لأبنه آدم (تفاصيل)
طمأن النجم تامر حسني جمهوره ومحبيه على الحالة الصحية لابنه آدم، مؤكد استقرار وضعه الصحي بعد خروجه من العناية المركزة.
وعلق حسني على صفحته الرسمية على موقع التواصل الاجتماعي بـ"فيسبوك" كاتبًا: "لكل الغاليين اللي اهتموا بتعب ابني الحمد لله الوضع مستقر بعد العملية التانية وخرج من العناية المركزة بفضل الله ثم دعواتكم، اللي لو عشت أشكركم عمري كله مش هوفي حقكم وربنا يتمم الشفاء على خير، ودايمًا بقول على دعواتكم الكريمة لكم مثلها وأضعاف أضعافها، شكرًا يا أغلى الناس ربنا يحفظكم ويحفظ ولادكم قادر يا كريم".
كان تامر حسني حرص في وقت سابق على توجيه الشكر لجمهوره على دعواتهم لابنه آدم بعد تعرضه لوعكة صحية شديدة استدعت دخوله العناية المركزة، كما قدم لهم نصيحة هامة لتجنب حدوث ما حدث لابنه لأي طفل آخر موضحًا تفاصيل الأزمة الصحية.
وقال حسني في منشور سابق: "أنا مش عارف أشكركم إزاي على كم الدعوات اللي دعيتوها لربنا لشفاء آدم ابني اللي جاتلي منكم هنا وعلى تليفوني وتليفونات كل المحيطين بيا هو عمل عمليتين كبار بسبب انفجار الزايدة المفاجئ اللي كانت أعراضه سخونية عادية بس وبقولكم كده عشان تبقوا حريصين مع نفسكم أكتر وولادكم".
تامر حسني: مش كل سخونية تقولوا ده شوية برد وخلاص لا روحوا اكشفوا كويس
وتابع محذرًا: "مش كل سخونية تقولوا ده شوية برد وخلاص لا روحوا اكشفوا كويس واعملوا سونار على البطن والزايدة مرة و2 عشان برضو ساعات مش بيبان ولازم الدكتور يضغط بطريقة معينة تقريباً أقوى شوية عشان يعرف لإني سمعت كتير اليومين دول إن الزايدة خادعة اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي".
واسترسل: "وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب ويعدي مرحلة الخطر"، داعيًا لابنه: "يارب بحق كن فيكون اشفيه وعافيه هو وكل ولادنا بس هو راجل وهيتحمل وإن شاء الله ربنا يكرمه ويعافيه ويحفظه هو وإخواته ويحفظ كل ولادكم يارب".
واختتم تامر حسني حديثه بتجديد الشكر العميق لجمهوره: "أحب أقول تاني شكرا من كل قلبي على دعواتكم أنا شايف قلب كل حد فيكم وهو بيدعي بصدق متشكر أوي يا جماعة شكرا لكل اللي اهتم وسأل عن ابني ودعاله هنا أو على التليفون واللي طلعوله صدقات لشفائه من غير ما يعرفونا شخصياً أنا مش لاقي كلام أشكركم بيه وأنا برضو بدعيلكم وبقول لكم مثلها وأضعاف أضعافها وربنا يحفظكم ويحفظ أولادكم قادر يا كريم".
