بدأت بموقف مؤثر.. مي عز الدين تروي تفاصيل تعارفها على شريك حياتها | فيديو

كشفت الفنانة مي عز الدين عن تفاصيل تعارفها على شريك حياتها أحمد مؤكدة أن البداية كانت خلال حفل للموسيقار عمر خيرت في لحظة لم تكن تتوقع أن تتحول إلى بداية قصة حب.

وقالت مي عز الدين خلال لقائها ببرنامج "صاحبة السعادة" مع الإعلامية إسعاد يونس على قناة "dmc": "أنا اتعرفت عليه في حفل عمر خيرت كنت متأثرة ومكنتش في وعيي الكامل من الإحساس وكان في لحظة بكيت فيها من الموسيقى".

وأضافت: "هو جه كلمني وقالي أنا دكتور وأنا بصراحة مديتش الموضوع اهتمام في الأول وبعد كده عرفت إنه صيدلي فعلا ومن هنا بدأت بينا معرفة بسيطة وبعدين بقينا صحاب".

وتابعت: "هو ساعدني في نظام غذائي وخسيت معاه وكان دايمًا ملتزم بكلامه وده خلاني أحترمه أكتر".

وأوضحت: "مع الوقت لقيت نفسي بفكر فيه كتير وحسيت إن في حاجة مختلفة خصوصًا إنه فاهم شغلي وضغوطه ومش بيحاول يغيرني".

واستكملت: "هو عنده اهتمامات فنية وبيحب التمثيل وداخل ورش قبل كده وكمان قريب من السوشيال ميديا وده خلاني أحس إنه فاهمني".

وقالت: "وجوده في حياتي جه في وقت كنت محتاجة فيه حد يطمني ويكون جنبي خصوصًا مع ضغط الشغل والظروف اللي مريت بيها".

وعن اعترافه بالحب قالت: "قالي بحبك في مكالمة تليفون قفلت وسرحت وخوفت في الأول من السرعة ومن القرار بس الإحساس كان حقيقي وجاي في وقت غريب".

واختتمت: "حسيت إن اللي حصل ده ترتيب من ربنا وإنه شخص مريحني ومخليني في حالة هدوء وسعادة".