«زهايمر ومتجوزة 16 مرة ».. يسرا تكشف أغرب الشائعات عنها

كشفت الفنانة يسرا عن أغرب الشائعات التي تعرضت لها خلال مسيرتها الفنية، منها أنها تعاني من مرض «الزهايمر»، ومحجور عليها، وأنها تزوجت 16 مرة.

وأضافت خلال لقاء مع برنامج «الصورة»، الذي تقدمه الإعلامية لميس الحديدي والمذاع على شاشة «النهار»، قائلة: «حاجة تضحك».

وعلقت الحديدي: «جت لي مرة وأنا مكتئبة، كنت مبطلة شغل، قلت لك: كده تاريخي ورايا ومش هشتغل تاني. قلتي لي: لا، لسه هتعملي كتير، وأنا كمان لسه هعمل كتير، ولازم تقولي لنفسك دائمًا: أنا لسه معملتش حاجة».

لتعلق يسرا: «دائمًا عبارة "لسه معملتش حاجة" تقودني حتى الآن في عملي أو أي حاجة جديدة، وكأني لسه جديدة، وبفضل أسأل نفسي: يا ترى هل اختياري صح؟ ولحد دلوقتي بخاف، مش عشان هنجح ولا هسقط، ولا أجيب فلوس ولا لأ».

وواصلت: «مش دي حساباتي، بخاف إني دائمًا أختار صح ليا، مش عشان حاجة تانية، لنفسي، للكارير. دائمًا ما أحبش أغلط في الاختيارات، "ما يصحش أغلط في الاختيار"».

وعلقت الحديدي: «لما بتغلطي بتعملي إيه؟».

لترد يسرا: «بقول لنفسي غلطة، مش بقف عندها. أنا مش لوامة، لكن أعاتب نفسي في بعض الأمور والحاجات، مش في الاختيارات. في حاجات في حياتي، مثلًا: ليه وثقتي في الشخصية دي؟ ليه إديتي المساحة لنيها؟ لكن لا أصل لمرحلة إني ألوم نفسي وأشعر إني غلطت في حق نفسي وحق الغير».

وذكرت أنها ليست شخصية «نكدية»، وتكره النكد، قائلة: «النكد بيجيب نكد وفقر، يجيب فقر. الحاجة الحلوة بتجيب الحاجة الحلوة. اللي خسرني هو الخاسر مش العكس. أنا حبيتك، اديتك، ولم يقدر ذلك، دي مشكلته».