الإعلامية هنا عبد الفتاح تكتب : جواز الراجل على مراته مش خيانة.. ده شرع ربنا

بقت موضة غريبة، أي راجل يتجوز على مراته في الحلال يتقال عليه "خاين وغدار"، وده خلط فظيع بين الحلال والحرام وبين الوجع والشرع.

_خلينا نفرّق الأول يعني إيه خيانة؟_

الخيانة في الدين وفي القانون وفي العُرف ليها تعريف واضح:
- الخيانة إنه يبقى متجوزك ويروح يعرف واحدة في الحرام، يكلمها، يقابلها، يزني والعياذ بالله.
- الخيانة إنه يكذب، يغش، يسرق فلوسك، يفشي سر بيتك، يدي وعد ويخلفه.
- الخيانة إنه يهمل بيته وعياله ومسؤوليته.

لكن راجل راح اتجوز على سنة الله ورسوله، اشهر جوازه، وكتب كتاب، وجاب شهود، وشال مسؤولية بيت تاني، ده اسمه ايه خيانة ازاي؟ ده اسمه _تعدد_.

ربنا اللي خلقنا واللي عارف نفوسنا قال في كتابه:
> "فَانكِحُوا مَا طَابَ لَكُم مِّنَ النِّسَاءِ مَثْنَىٰ وَثُلَاثَ وَرُبَاعَ ۖ فَإِنْ خِفْتُمْ أَلَّا تَعْدِلُوا فَوَاحِدَةً"

ربنا ما قالش فاخونوا، قال فانكحوا. والنكاح عمره ما كان خيانة. النبي نفسه والصحابة عددوا، هل نقدر نقول عليهم كانوا بيخونوا زوجاتهم؟ حاشا لله.

_ليه بنقول عليه مش خيانة؟_

1.  _الخيانة بتتعمل في السر، والجواز بيتعمل في العلن:_ الخاين بيستخبى ويمسح الشات ويقفل التليفون، اللي بيتجوز بيروح لمأذون وبيعرف أهله وأهلها.
2.  _الخيانة حرام، والتعدد حلال:_ مينفعش اساوي حاجة ربنا حرمها بحاجة ربنا حللها عشان وجعتني. الوجع حقك ومشاعرك على راسنا، تزعلي وتغيري وتاخدي وقتك، ده حقك كست. لكن متحرميش حلال ربنا عشان انتي موجوعة.
3.  _الخيانة بتضيع الحقوق، والجواز بيحفظها:_ الخاين بيضيع حق مراته وبيته، اللي بيتجوز في الحلال هو ملزم شرعاً وقانوناً ينفق ويعدل ويسكن ويتحمل مسؤولية كاملة.

اللي يوجع بجد مش انه اتجوز، اللي يوجع انه يكون ظالم، مش عادل، مش مقسم وقته، مش مراعي مشاعرك، بيعايرك، بيكدب. ده اللي نحاسبه عليه.

لكن نقول "كل راجل يتجوز على مراته خاين"؟ يبقى احنا كده بنقول على شرع ربنا خيانة، ودي كلمة كبيرة اوي وحرام تتقال.

_من حقك ترفضي التعدد لنفسك،_ من حقك تطلبي الطلاق لو مش قادرة تكملي، من حقك تشترطي في عقد جوازك انه ميتجوزش عليكي، كل ده الشرع اداهولك. لكن مش من حقنا نسمي الحلال خيانة.

الخيانة هي الحرام اللي في الضلمة.. مش الحلال اللي على سنة الله ورسوله.

*وده بقى اللي يخلينا نيجي لمسلسل #طالع_نازل*

اللي بتعمله منى زكي في المسلسل ملوش أي علاقة بالقوة ولا بالجدعنة ولا انها "كوين" زي ما الكومنتات بتقول، ده إجرام صريح حرام شرعاً ومجرم قانوناً.

مفيش أي مبرر يخلي واحدة تطحن مخدرات وتدسها في أكل وشرب جوزها عشان تدمره وتخليه مدمن، ده في الشرع غدر، وفي القانون شروع في قتل بالسم مادة 233 عقوبات عقوبتها الإعدام.

ومفيش مبرر انها تزرع malware وتتجسس على تليفونه، ده اختراق وانتهاك خصوصية مادة 14 و 18 جرائم تقنية معلومات.

أصل هو اتجوز عليها؟ ما هو اتجوز في الحلال! وأصل هي استحملت معاه؟ هي استحملت باختيارها ومحدش أجبرها، ولسه الاختيار في ايدها لحد دلوقتي.

اللي مش قادرة تكمل من حقها تطلب الطلاق وتمشي وراسها مرفوعة، وده اللي الشرع والقانون كفله ليها.

لكن مش من حقها أبداً ترد الأذى اللي هي شايفاه أذى بإجرام أبشع منه وتسمم وتتجسس وتقول أصلها موجوعة.

القوية بجد هي اللي بتمشي، مش اللي بتغدر وتسمم.

#التعدد_مش_خيانة