مخرج "زلزال" يجسد مشهد وفاة والده في المسلسل

شارك مخرج مسلسل زلزال إبراهيم فخر مقطع فيديو من مسلسل زلزال الحلقة 21، وهو مشهد موت عم غوبريال الذي تبنى محمد حربي الذي يجسد شخصيتة الفنان محمد رمضان، عبر صفحتة الشخصية على موقع التواصل الإجتماعي الشهير "فيسبوك".

وعلق فخر على الفيديو قائلاً: "٢٢ يناير ٢٠٠٨ كنت في القاهره راجع من الشغل الصبح ولسه نايم وجالي تليفون بابا تعبان وعايز يشوفك نزلت جري وأول ما دخلت البيت فهمت، كل وش بصيت فيه كان بيقول اللي حصل بس مكنتش مصدق بحضن أمي واختي وعيونهم مليانه دموع وبرضه لسه مش مصدق لحد ما دخلت عليه نايم في سريره هو زي ما هو نفس شكله وهو نايم حسيت للحظه إني لو صحيته هيفتح ويرد عليا هزيته بالراحه وندهت بابا بابا مردش".

وتابع فخر حديثة قائلاً: "وهنا بس فهمت بوسته وفضلت باصص له وكأني بحوش صورته في عنيا بشبع منه، هو اللي علمني كده اصلي شفته عمل كده مع جدي برضه حتي في دي قلدته الله يرحمك يا بابا نص الفرحه اللي في الدنيا خلصت لما رحت كل فرحه بعد منك نص فرحه فرحت لما خلفت نص فرحه عشان كان نفسي تشيل عيالي فرحت وانا بتجوز نص فرحه عشان كان نفسي تبقي جنبي حتي لما اشتريت اول عربيه كان نفسي تركب جنبي فيها او نسافر بيها سوا النهارده مش عيد ميلادك ولا ذكري وفاتك بس النهارده عملت مشهد طلعت فيه كل اللي كنت حاسه ومش قادر اقوله من يوم ما غيبت والنهارده بهدي المشهد ده ليك وبرضه فرحان نص فرحه .. عشان نفسي تشوفه".

ويذكر أن مسلسل زلزال الحلقة 21 من تأليف عبد الرحيم كمال، إخراج إبراهيم فخر، إنتاج شركة سنيرجى، بطولة محمد رمضان، حلا شيحة، ماجد المصرى، نسرين أمين، منى عبد الغنى، هنادى مهنى، حسام داغر، مصطفى منصور، يوسف عثمان، آية هلالى، سلوى عثمان وعدد آخر من الفنانين وتدور أحداثه فى إطار شعبى.