"عقلية مراهق" تتسبب في دمار أسرة بالكامل.. والسبب قطعة حشيش

خرج المواطن باسم فهمي عبدالرحمن، صاحب 45 عامًا، سائق "توك توك" ومقيم بشارع مكة بمنطقة كفر طهرمس دائرة قسم شرطة بولاق الدكرور، باحثًا عن قوت يومه هو وأولاده الـ 4 وزوجته، ولكن القدر جعله يقع في طريق مجرم قام باصطحابه لـ منطقة مهجورة، وطالب المتهم فى القضية من المجنى عليه بترك التوك توك له، لـ يسرقه فرفض المجنى عليه وقاومه ليقوم المتهم فى القضية باستخراج سلاح ابيض " مطوة" وطعنة 9 طعنات متفرقة فى الجسم ويلفظ باسم أنفاسه الأخيرة، مدافعا عن ماله.

زوجة المجنى عليه :

" كسروا وسطى ووسط عيالى.. خدوا كل حاجة حلوة فى الحياه.. لو شفت المتهمين هقولهم منكم لله أنتوا دمرتوا عائلة بالكامل مش قتلوا واحد بس.. هو كلمنى بعد ما المتهمين فى القضية ضربوه.. هو قالي ألو بس و متتكلمش تانى.. وفضلنا نرن عليه أنا وأولادى لـ الساعة 4 الفجر و مبيردش.. جوزى كان بينزل يشتغل على التوك توك عشان يصرف علينا والله .. متزوجين من 22 سنة، وعمره ما ضربنى فى يوم.. كان بيرفض أشتغل فى أى عمل لمساعدته فى مصاريف البيت..بهذه الكلمات المؤثرة بدأت منار زوجة المجنى عليه باسم فهمي عبدالرحمن حديثها ".

ودخلت منار زوجة المجنى عليه، فى حالة بكاء شديد قائلة: " انا مش عارفه هنعيش إزاى بعد ما مات .. انا عندي بنت مخطوبة وكان بيجهزها، والثانية وراها على طول.. وعندى ضياء و أحمد .. المتهم قضى على الأسرة بالكامل.. انا عرفت أن جوزي مات لما شوفت عربية الشرطة والإسعاف فى البلد بس كنت بكدب نفسي.. بس الموضوع طلع حقيقي".

وطالبت زوجة المجنى عليه بتوقيع أقصى العقوبة على المتهمين قائلة: " انا عايزة حق جوزي يرجعلي .. عشان هو كان بـ يسعى على أكل عيشنا و الكتهمين فى القضية قتلوه عمدا بعد رفضه ترك التوك توك".

نجل المجنى عليه الأكبر .

وفى نفس السياق قال ضياء باسم فهمي عبدالرحمن، ابن المجنى عليه، إن والده ينزل للعمل كل يوم على التوك توك، من الصباح حتى الساعة الـ 3 فجرًا، ولا يتأخر فى العمل بعد الساعة الـ 3 ، وفى هذا اليوم المشئوم ظل لبعد الساعة الخامسة، خارج البيت والجميع ينتظره ويقوم بالاتصال عليه ولا يرد، وبعد اتصالات كثيرة رد أحد الأشخاص وسأله عن هويته وقال له أنه ابن صاحب الموبايل ليرد الآخر " أبوك مات" .

ودخل الشاب في حالة بكاء، قائلا: " انا لم اتخيل ان والدى قتل، وتوقعت أن هناك عصابة تريد أموال فقط من والدي، كنت بصوت زي النسوان ومحستش بحاجة لما شفت ابويا ميت ومرمى على الأرض، أنا أول واحد شوفت ابويا وطالبت من خطيب شقيقتي بعدم اصطحاب باقى اسرتى لعدم رؤية والدى وهو مقتول وملقى على الأرض وعليه قطعة قماش " .

ووجه الشاب ضياء رسالة لوالده المجنى عليه وهو يبكي قائلا : " انت عشت راجل ومت راجل وسبت من خلفك راجل.. لا تقلق على اشقائي"، و ووجه ضياء الشكر لرجال الشرطة لتمكنهم من ضبط المتهمين فى أيام قليلة من ارتكاب الجريمة.

وتحدث أحمد باسم فهمي، صاحب الـ 13 عامًا ويدرس فى المرحلة الإعدادية قائلا: " انا كان قلبي حاسس أن ابويا هيموت وعشان كده بوست رأسه قبل ما ينزل الشغل فى اليوم اللى قتل فيه، ودخل أحمد فى حالة بكاء هو الآخر قائلا ربنا يرحمك يابابا حقك هيرجعلك والعيال ده هتتعدم عشان فى قانون" .

وقال مصدر أمنى، إن القسم تلقى بلاغًا بالعثور على جثة شخص، بشارع مكة بمنطقة كفر طهرمس دائرة القسم، وعلى الفور تم الانتقال لموقع الحادث لكشف تفاصيل الواقعة.

وأوضح أن المجنى عليه كان مطعونًا بـ 9 طعنات، وتم الانتقال قبل وصول أسرة المجنى عليه، مؤكدً أن سرعة الانتقال لموقع الحدث من أولويات رجال المباحث، وكشف أن التحريات الاولية للجريمة تبين أن الدافع من القتل هو سرقة التوك توك من المجنى عليه، وأكد أن شاهد رؤية كان أول الخيوط في الوصول المتهمين، والذين يعيشون فى محافظة المنيا، على الرغم من أن الجريمة تم ارتكابها فى الجيزة.

وأشار المصدر الأمنى ، إلى أن التحريات كشفت أن وراء ارتكاب الواقعة، ثلاث أشخاص وهم "ع .ش" 19 سنة، سائق توك توك ، وشقيقه "أ. ش " 16 سنة، سائق توك توك.

عقب تقنين الإجراءات أمكن ضبطهما وبمواجهتهما اعترفا بارتكاب الواقعة، وأكدوا أنهم غيروا معلومات التوك توك وتم نقل التوك توك من الجيزة لـ المنيا بعربية نقل، وتم القبض على والدهما الذي شاركهم فى تسهيل نقل التوك توك من الجيزة المنيا، وتم الوصول للمتهمين بعد 4 أيام من ارتكاب الجريمة.

وقال المتهم الأول فى القضية، عمرو .ش" 19 سنة، سائق توك توك، إنه كبير أسرته، ويقوم بمساعدة والده فى مصاريف البيت، وأكد أنه قام بارتكاب الجريمة لشراء المخدرات موضحًا: " مش معايا فلوس اصرف بيها على نفسي وكنت عايز فلوس عشان أشرب حشيش، و اشتري بيت زي الشباب.. انا مكنتش عاوز أقتله .. انا كنت عايز اسرق بس، ضربته بالمطوة أكثر من طعنة، بس هو اللى قاوم .. أنا قتلته ودموعى نزلت.. والله انا سيبته عايش و صعب عليا بعد ما ضربته وخفت انه يفضحني " .

وتابع المتهم فى القضية : " لو مكنش قاومنا مكنتش موته .. انا سبت الجثة فى الشارع ومشيت انا و اخويا، وعارف أن الشرطة هتجننى، انا معترف بالندم ودخل المتهم فى القضية فى حالة بكاء قائلا: " دى اول واخر مره هعمل كده" .

وقال المتهم الثانى فى القضية، "أشرف" 16 سنة، سائق توك توك، شقيق المتهم الأول، " انا خوفت منه وانا وابويا مكناش نعرف ان هيعمل كده، واعترف المتهم الثانى على شقيقه الأكبر وقال إن شقيقه قام بضربه أكثر من طعنة، وأنه هو السبب فى كل هذه المشكلات، ودخل فى حالة من البكاء الشديد قائلا: " انا مليش علاقة بيه، وبخاف منه وعشان كده مقدرتش اتكلم" .

وفى نفس السياق قال المتهم الثالث ووالد المتهم الأول و الثانى: " المتهم الأول عمرو كان عليه أكثر من قضية، ولما جبت له العربية لنقل التوك توك مكنتش على علم أنه قام بقتل شخص وسرق التوك توك، و أكد أن نجله يتعاطى المواد المخدرة و انا مبقدرش عليه، وأوضح : " انا كنت بدعى عليه أن ربنا يصيبه بالعمى حتى لا يتسبب فى مشكلات لأحد" .