إلهام شاهين: «الحقيقة غير إن حياتنا حفلات وفساتين خالص»
خطفت الفنانة إلهام شاهين، الأنظار في ندوة تكريم الفنانة الكبيرة يسرا ضمن فعاليات مهرجان الجونة السينمائي، بكلماتها الصادقة والمؤثرة عن حقيقة حياة الفنانين بعيدًا عن الكاميرات والأضواء، مؤكدة أن ما يراه الجمهور ليس إلا جزءًا صغيرًا من الصورة.
وقالت إلهام: “الناس بتشوفنا متصورين في حفلة مثلا وبنرقص وبنغني ولا لابسين حلو، لكن حياتنا مش كلها كده! متتصوروش المتاعب اللي بنعيشها”.
وأضافت: “مبتشوفوش لما فنان يبقى مريض ولازم ينزل يصور عشان المسلسل بيتعرض على الهواء، في ظروف كتير بتبقى صعبة جدا.. الواحد ممكن يكون تعبان أو حزين أو فقد شخص عزيز عليه، ورغم كده بنشتغل”.
تصريحاتها أثارت تفاعل كبير من الحضور الذين عبروا عن تقديرهم للفنانين وما يتحملونه من ضغوط نفسية وجسدية في سبيل إسعاد الناس.
فالكثير لا يعلم أن الفنان قد يقف أمام الكاميرا وهو يعاني من ألم شديد، أو يبتسم للجمهور رغم أنه يعيش حالة حزن أو فقد.
إلهام شاهين أوضحت من خلال كلماتها إن البريق اللي بيشوفه الناس على الشاشة أو في المهرجانات مش دايمًا بيعبر عن الحقيقة، وقالت إن الفن مهنة فيها تعب وضغط كبير، لكن حب الجمهور هو اللي بيخلي الفنان يكمّل ويستحمل كل الصعوبات.
حديثها كان بمثابة رسالة للجمهور علشان يشوفوا الجانب الإنساني من حياة الفنانين، ويدركوا إن ورا الصور المبهجة في المهرجانات والمناسبات في تعب ومجهود كبير، وإن الفنانين مش دايمًا عايشين حياة مليانة رفاهية زي ما البعض متخيل، لكنهم بشر زي أي حد بيواجهوا تحديات وأوقات صعبة، ومع ذلك بيكملوا عشان الفن والجمهور.