مرتضى منصور لوزيرة الثقافة: الفنانات يتسابقوا على "القلع" في المهرجانات

انتقد النائب مرتضى منصور، ما وصفه بالأفلام الهابطة، وما يحدث في المهرجانات من تسابق الفنانات على خلع الملابس.

جاء ذلك بالجلسة العامة للبرلمان المنعقدة الآن، بحضور وزيرة الثقافة الدكتورة إيناس عبد الدايم، لمناقشة طلبات إحاطة مقدمة من النواب، ببعضها متعلق بضعف الرقابة على المصنفات الفنية المسموعة والمرئية مما أدى الى الترويج للعنف.

وقال منصور: "فرصة والوزيرة موجودة، أنا عندى 5 موضوعات، الأول المشكلة المثارة من غير لازمة الخاصة بالمنتقبة فى مركز كفر الدوار، التى تولت مدير قصر ثقافة كفر الدوار، إحنا مش ضد المنتقبات ولا المحجبات، لكن اختيار منتقبة فى هذا المكان كان اختيار خطأ والمعالجة كانت خطأ، مقدرش أقول إن طبيب يروح وزارة الصحة بشورت وفانلة، هناك أعداء يتربصون بالوطن وتوجد بعض وقائع الانتحار، ويتكلموا فى قصة تانية إنه انتحر عشان مش لاقى شغل وبكدا يشجع الشباب على الانتحار".

وأضاف: "بخصوص مهرجان زي مهرجان الجونة مثلا كله بيتسابق أكتر قطعة من الملابس تتقلع إيه، دا مش معناه إن الفنانات المحترمات كل واحدة رايحة من غير لبس، وبالنسبة لمهرجان الإسكندرية، هل هناك تطبيع ثقافي فني مع تركيا وقطر، إزاى تتعرض أفلام في المهرجان من إنتاح فني وقطري، فين الرقابة".

واستطرد منصور: "عمالين نقول فيه عنف فى الشارع، فيه حاجات مش محترمة فى الشارع، اللى عمل دا الأفلام والمسلسلات، هاتيلى فيلم مفيهوش الناس بتقتل ولا مفيهوش قمصان نوم، أين دور وزارة الثقافة فى دا، كلنا عارفين المخرج اللى عمل أفلام بدء من وهى فوضى، وفعلا حولها فوضى فى 25 يناير، ثم الأفلام الجنسية اللى عملها".