ماس رحيم تُطلق أولى أغنيات ألبومها الجديد "ضيعتني"

أطلقت المطربة الشابة ماس رحيم أولى أغنيات ألبومها الجديد بعنوان "ضيعتني"، وهي من كلمات وألحان والدها الموسيقار الراحل محمد رحيم، وتوزيع كريم أسامة، ومن إنتاج شركة ديجيتال ساوند. الأغنية تمثل انطلاقة فنية مميزة لماس، وتحمل طابعًا خاصًا نظرًا لارتباطها بوالدها الذي ترك بصمة كبيرة في عالم الموسيقى العربية.

وقالت ماس في تصريحاتها إن أغنية "ضيعتني" تمثل لها مكانة خاصة جدًا، لأنها من اختيار والدها الراحل، مشيرة إلى أن اللحن الذي قدمه لها هو أحد ألحانه القديمة التي كتبها ولحنها في سن الشباب، وأضافت: "الوالد كان شايف إن الأغنية دي شبهي، وإن محدش هيقدر يقدمها غيري، وكان دايمًا حريص إن كل أغنية تبقى حالة خاصة وشبه صاحبها، زي ما كان بيعمل مع كل فنان جديد اكتشفه، ومنهم الفنانة روبي."

وتابعت: "اختارنا سوا أغنية (ضيعتني)، وهي مش حزينة زي ما الاسم يوحي، لكنها بتحمل معنى جميل، وكل أغنية في الألبوم ليها قصة وشخصية مختلفة. وأنا بقدم الألبوم بفخر كبير مش علشاني، لكن علشان والدي، لأنه غيّر شكل الموسيقى العربية على مدار 30 سنة."

وأضافت ماس أنها بدأت حب الموسيقى منذ كان عمرها خمس سنوات، وكانت تشعر بوالدها في كل تفاصيل الحياة اليومية، قائلة: "كنا بنتكلم بلغة المزيكا، لو هو عاوز يوصل لي إحساس أو أنا عايزة أوصل له حاجة، كنا نغني لبعض، كان صديقي وصاحبي في كل حاجة."

واختتمت ماس حديثها بتأثر واضح قائلة: "أنا فخورة جدًا إني بنت محمد رحيم، وباحمد ربنا كل يوم إنه خلاني بنته وخلاه أبويا، وهفضل أكمل مسيرته علشان تأثيره في الموسيقى لازم يفضل موجود. لسه في حاجات كتير من أعماله الناس ما سمعتهاش، وهتتشاف قريب إن شاء الله."

وتقول كلمات الأغنية:ضيعتني منك لله، وجرحتني منك لله، خليتني أحزن على اللي فات،.و أندم على قلبي وهواه، مش عيب أقول إني اتخدعت
أو إني ضيعت لما إنت بيعت
هبدأ حياتي من تاني عادي
أما اللي جاي سيباه لله.